من مذكرات زوج مخلوع!

ــــــــــــــــــــــــــــــــــــــــــــــــــــــــــــــــــــــــــــــــ

من مذكرات زوج مخلوع!

ــــــــــــــــــــــــــــــــــــــــــــــــــــــــــــــــــــــــــــــــ

سي السيد في عُرف زمان

راحــت يا عــــــــم عليــــه

أهـــو أصبــح راجل غلبان

والعصمة ما هش فى ايديه

كــده حـلت محلـــه مــــدام

تتحكـــم و تبهــــدل فيـــــه

و دا قلـبي إللــي كله حنـان

أشــعلت النـار تـشـــــــويه

و كأنــــــــــــه زر بطـاطـــا

أكلتــــــه بعديــــن ترميـــه

العِشــرة هانت ببســــــاطه

الدنيـا جــرى لـهـا إيــــــــه

حــبت عــليَّ شلاطـــــــــــه

دابـت فـــــي رمـش عينيــه

خلعتنـــي بكــــل ألاطـــــــه

و فـدتنــى بربـــــع جنيـــه!

******************
بعــد الخُلـع و حُكمــه مـريـر

قصـتي ناوي أعملهـا روايـه

ضاع من عمري قليل و كتير

و التـجاعيد حكايتهــا حكايـه

شـعـرى الأبيض لـون الجـير

لكـن قلبـي شـــباب جوايــــه

رحــت أتجـــوز أم الخيـــــــر

قصدي شريف والعذر معايه

تطــبخ باميـــه آكـــل جرجيـر

أصـل الحـلـوة ناقصـة درايـه

كـل صبــــاح عنـد الكوافــيـر

واقفـه تمللي قصادها مرايـه

قلت اسـتحمل يمكـــن خـــيـر

جـيت و لقيتها شـايله حوايـه

قال بتقوللي: روح يا أســــير

آه مـش قـادره تعيش و يايه!

حتـى إن كــنت مـلاك و أمـير

خالعاك يالا ما عنتــش جايـه

قمـت كســــرت وراها الزيــر

كان مسنود على حسن نوايـه

عمـر ما خُـلعـك أمـر خطـــيـر

ما انا مخلوع قبل كده كفايـه!

ــــــــــــــــــــــــــــــــــــــــــــــــــــــــــــــــــــــــــــــــ

من ديواني: من مذكرات زوج مخلوع

ـــــــــــــــــــــــــــــــــــــــــــــــــــــــــــــــــــــــــ
نُشر زجلي هذا في جريدة الخميس العدد{81} بتاريخ24  /2 /2000 صفحة 2